لای خوێنەرانی بەڕێز ئاشکرایە یەکەم نوسەری کورد بوم کە لە ٢٠١٥ دا ستراتیژی بڕینی موچەی فەرمانبەرانی هەرێمم یەکسان کردەوە بە ستراتیژی ڕوخاندنی قەوارەی هەرێم. واتە: ئەگەر دەیان ڕێکەوتننامە لە نێوان بەغداو هەرێم ئیمزا بکرێ، هیچ گەرەنتی دورمەودای نییەو، هەم بەغدا واز لە ستراتیژی خۆی کە [پرۆسە]ی ڕۆخاندنی قەوارەی هەرێمە ناهێنێ و، هەمیش سەرکردەکانی یەکێتیی و پارتیی چاکسازی گشتگیر ناکەن و واز لە خیانەتی نەتەوەیی و تاڵانکاریی ناهێنن.
ستراتیژی ڕوخاندنی قەوارەی هەرێم: [پرۆسێس]ە، واتە: چەندین تەکتیک لەلایەن عێراق (ئێران)ەوە لەخۆدەگرێ، لەوانە: دروستکردنی گروپ لە ناوخۆدا کە داوای بەستنەوەی ڕاستەوخۆی شارەکانی هەرێم بکەن بە بەغداوە (وەک ئەوەی ئێستا ئەردۆگان لە ڕێی ئۆجەلانەوە دژی مافی نەتەوەیی بۆ کوردانی باکور لە ژێر ناوی درۆینەی برایەتیی تورک و کورد و مافی هاوڵاتیبون دەیکات).
سەرانی پارتیی و یەکێتیی لە ٢٠١٥ ەوە کە جەلال تاڵەبانی سەمامی ئەمان و سەید ڕەئیسی عێراق بو. تەنیا شوێن بەرژەوەندی بلێۆنێربونی وەچەکانیان کەوتن و، گوێیان بە خوێندنەوە ستراتیژییەکانم نەدەداو، خۆشیان خاوەنی ستراتیژێکی نەتەوەیی-نیستیمانیی نەبون لە ڕوخانی ڕژێمی سەددام لە ٢٠٠٣ وە.
ئاشکراشە گەر لە خۆیان نەبیت، گەر چەندین پێشنیاری ستراتیژیش بخەیتەڕ، مادەم ڕەخنەی لۆژیکی دەگریت؛ ڕقت لێ هەڵدەگرن. تا گەیشتە ئەو ئاستەی نایاساییەی کە یەکێتیی لە لیستی زەوی پێدانی مامۆستاکانی زانکۆی سلێمانیی، زەوی هەشت دەفتەرییان بە من نەدا. ئەڵبەتە میللەتەکەشمان بە هیچ نازانێ!
کاتێک دەمنوسی، هەڵەیەکی ستراتیژییە؛ نێچیرڤان بە گوێی مەلابەختیار و قوباد بکات و، بڕوات لەگەڵ کۆمپانیای ڕوس-نەفەت و ڕوسیا ڕێک بکەوێ و، ئەو پەت-پەتێنکردنەی لە نێوان ئەمریکاو ڕوسیا، شێخ مەحمود ئاسا وا دەکات بەتەواوی ئەمریکا بکاتە دژی ڕیفراندۆمەکەو، دەستی ئیسرائیلیش دەبەستێ لە هاوکاریکردنی کورد؛ نوسەران و سیاسەتبازانی کورد گاڵتەیان بە خوێندنەوە ستراتیژییەکەم دەهات!!
کاتێک لە دەیان بابەت دا، لە ٢٠١٢ ەوە بە خوێندنەوەی ستراتیژی شیم دەکردەوە: بەرەی مقاومە دەڕوخێ (کە ڕوخاوەو ئێستا بەرەی المهزومە)یە؛ وەڵاهی زۆربەی هەرە زۆری کورد گاڵتەیان بە شیکارییە ستراتیژییەکانم دەهات!
تەنانەت لە دوایین بابەتەکانیشم دا، کاتێک لە بابەتی "پەیامێ بۆ مەسعود بارزانیی" کە لە ڕۆژی ٢-٦-٢٠٢٥، چەند ڕێگەچارەیەکم پیشانی دەسەڵاتداران دا، کەس نەیگرتنەبەر!
زۆر ڕونە، لە سیاسەت دا: "سازش؛ سازشی دیکەی بەدوا دێت".
ئەگەر تەنانەت ئەمڕۆ بەغداو هەرێم ڕێکەوتنامەیەکیش ئیمزا بکەن لەسەر موچە. بەغدا دەزانێ پارتیی و یەکێتیی بۆی کەوتونەتەسەر ئەژنۆ؛ بۆیە تا دێت تەکتیکی تر بۆ ستراتیژەکەی (کە ڕوخاندنی قەوارەی هەرێم)ە، دەگرێتەبەر.
کاتێک لە ٢٠١٢ وەک خوێندکارێکی یەکەم، لە یەکەم پرۆژەی تواناسازیی، ڕۆشتم بۆ خوێندن و، لە زانکۆی لەندەن ماستەرم لە سیاسەت و ستراتیژی بەریتانیا و ئەمریکا خوێند، یەکەم خوێندکاری کورد بوم بابەتێکم نوسیی و، داوام لە د.بەرهەمی سەرۆک وەزیران و د.دلاوەری وەزیر و سەرانی تواناسازی کرد، تکایە لە بری ناردنەدەرەوەی خوێندکارە یەکەمەکانی بەشەکانی زانستە مرۆڤایەتییەکان، سەد خوێندکار بنێرنە بەریتانیا و ئەمریکا بۆ خوێندن لە زانستی تەکنەلۆژیای جەنگیی و درۆن، چونکە کورد پێویستیی بەوەیە: هێزی پێشمەرگە پڕچەکی تەکنەلۆژیای جەنگیی بکات. بەڵام هەمویان گاڵتەیان بە بیرۆکەکانمم دەهات!! (هەمو بابەتەکانم ماون و، خوێنەرانی بابەتەکانیشم شاهیدن!). چونکە سیاسەتیان وەک نان خواردنی ڕۆژانە بۆ سک و بە سک دەکرد، نەک بە عەقڵ و دوربینین.
وەک وتم: ئەو زەمەنە جەلال تاڵەبانی سەمامی ئەمانی عێراق بو. لەلایەک عێراقی بۆ عەرەب دروست دەکردەوە، لەلایەک پرۆژەی لە سەدا سیی و دوی بۆ پێدانی کەرکوک بە عەرەب و تورکمان دەخستەڕو بۆ ئەوەی لە سەرۆک کۆماری بەردەوام بێ و، لەلاکەی تریشەوە نەیدەتوانی کاربکاتەسەر مالیکی کە بۆچی موچەی فەرمانبەرانی هەرێم دەبڕێ!
لە ٢٠٠٣ تا ٢٠١٥، هەر کوردێک لە بەغدا بەرپرسیارێتیی هەبوایە؛ هەر موچە دەهات. چونکە ئەمریکییەکان دەیاننارد و، عێراق هیچی بەسەر هیچەوە نەمابو.
بەڵام جەلال تاڵەبانیی و مەسعود و نەوشیروان ڕۆشتن، لە پێناو پارەو پۆست، عێراقیان بۆ گیانی کورد دروست کردەوە! بە بێ ئەوەی هیچ ستراتیژێکیان هەبێ. تەنیا فریو دران بە چەند بەندێکی ناو دەستوری عێراق، وەک مرەکەبی سەر کاغەز، کە نیشانەی ناسیاسەتزانین و ناستراتیژزانینیان بو. لەم لاشەوە بە بۆڕە بۆڕی فەرهاد سەنگاوییەکان وەک [جۆرج واشنتنێک!] بۆ کورد بە ڕۆڵەکانی کورد دەناسران. تەنانەت گەڕەکەکانی کەرکوکیان دابەش کردبو لە نێوان پارتیی و یەکێتیی دا. تاڵەبانیی دەڕۆشت، سەرۆک عەشیرەتی عەرەبە هاوردەکان کە ڕایان کردبو، دەهێنایەوەو، دیوەخانانەو ئۆتۆمبێلی مۆدێل بەرزی پێدەدان. هەمویم بە بەڵگە لەلایە!
ئێستا لە بردنەپێشەوەی تەکتیکەکانی ناو ستراتیژی (ڕوخاندنی قەوارەی هەرێم)، حکومەتی بەغدا (ئێران) هەنگاوی بەرەو تەکتیکێکی تری هاویشت، چونکە لە تەکتیکەکانی پێشوی ئەم ستراتیژەی دا قۆناغ بە قۆناغ سەرکەوت، ئەم تەکتیکەشی ئەوەیە: کێڵگە نەوتییەکانی هەرێم بکاتە ئامانج. بۆچی ئەم تەکتیکە لەم قۆناغە؟
چونکە بەوە ڕێگا لەوەش دەگرێ کە یەکێتیی و پارتیی نەوت بفرۆشن و، کۆمپانیاکان بێنن. تەنانەت ڕێگا لە زیادبونی بڕی کارەبای هەرێمی کوردستانییش دەگرێت.
واتە: بەغدا قۆناغ بە قۆناغ یەک لە دوای یەکی تەکتیکەکانی دەباتە پێش!
سەرانی یەکێتیی و پارتییش هەر سەرمەستی ناو دیوەخانی سەرۆک عەشیرەت و قەبیلەکانن. کاتێک تۆ لە فۆرمی ناسیۆنالیزمی خێڵەکیی دا نیشتیمانەکەت دابەش و تیکە-تیکە کرد و، هەنگاوت بەرەو ناسیۆنالیزمی مۆدێرن نەنا؛ ئەوە بەرهەم و دەرئەنجامەکەی دەبێ!
بێگومان تورکیاش ئەم پرۆسەی عێراق (ئێران)ەی دژی هەرێم پێ خۆشە. واتە: ستراتیژی ڕوخاندنی قەوارەی هەرێم؛ [پرۆسە!!!]یەکە لە چەندین تەکتیکی یەک لە دوای یەک پێک دێ و، تورکیاش لە کردەوەدا، هاوستراتیژی عێراق (ئێران) دەبێ، نەک لە میدیا دا!! ئەوەش بۆ غافڵترکردنی نێچیرڤانی نزیک لە تورکیایە!!
هەر ئەوەشی تورکیا (حاجی شێخ عەوڵا ئۆجەلان) لەم دو ساڵەدا بەکاردێنێ؛ دیسانەوە هەمان ستراتیژە کە بزافە کوردییەکان والێبکەن کە داوای فیدراڵیی-جوگرافیی بۆ هەر پارچەیەکی کوردستان نەکەن و، دەوڵەتە ئیمپریالیستەکانی تورک، فارس و، عەرەب، لە ژێر ناوی برایەتیی درۆیینەو مافی هاوڵاتیبون دا، لە دورمەودا دا خێراتر بتوانن کورد لە ناو دەوڵەتە ئیمپریالیستەکانیان ئاسمیلاسیۆن بکەن و، بتوێننەوە.
هەر ئەوەی (حاجی شێخ ئاپۆ) دەستەواژەی (باکوری کوردستان) لە هیچ بەیاننامەیەکی دا بەکارناهێنێ و، پێشتریش لای ئەسەد ڕایدەگەیاند: "شتێک نییە بە ناوی خۆراوای کوردستان" و، موراد قەرەیلانییش دەیوت: "ئێمە وەک هەمو گەللی کورد دژی ڕوخاندنی ئەم ڕژێمەی ئێرانین"؛ هەمو ئەمانە یەک ستراتیژن بۆ لەناوبردنی کوردستان وەک نیشتیمان. سەرکردەکانی پەکەکەش هەر یەکەیان ڕۆڵی حەسەن خێری تێدا دەبینێ و، پارتیی و یەکێتییش وەک دو باندی مافیایی؛ نە هەنگاوی دروستی سیاسیی و ستراتیژی دەنێن و، نە ڕێگاش دەدەن کەسانێکی زانستی وەک ئێمە، کە لە زانکۆ باڵاکانی جیهان پلەی بەرزی زانستیمان بەدەست هێناوە، بەشداری حوکمڕانییەکی تەندروست بین کە ئەم دۆخەی باشوری کوردستان، ڕزگار بکەین.
بۆ سەدەیەمین جار بە بیر خوێنەرانی بەڕێزی دەهێنمەوە، ئایا پارتیی و یەکێتیی تەنانەت توانیان لە ٢٠٠٣ وە، لە بەسرەو شوێنە ستراتیژییەکانی عێراق ڕێکخستنی نهێنیی بڕوێنن بۆ ئەوەی لە ساتە پێویستەکان، بە درۆنی ئاسایی، عێراق ئیفلیج بکەن و، وەک کارت بەکاری بهێنن! توانییان دو گروپی کۆنەپەرست لە شارەکانی عێراق بڕوێنن کە کەس نەزانێ ئەمان دروستکاریانن!!
پارتیی و یەکێتیی لە ڕوی ستراتیژی سەربازیشەوە؛ یەکدەست نین!
لێرەدا گرنگە ئاماژە بەوەش بدەم: دەبینم زۆر بەڕێز بەردەوام ڕەخنە لە ئیسرائیل دەگرن. خۆ ئیسرائیل ئەنفال و کیمیابارانی ئێمەی نەکردوە. هەمو گەلانی دنیا [تەنیا] بۆ بەرژەوەندی نەتەوەو نیشتیمانەکەی خۆیان تێدەکۆشن و هەڵوێست دەردەبڕن!
بەڕێزان ئایا دژایەتیکردنی ئیسرائیل لەلایەن هەندێک کوردەوە، وەک ئەوەی پەکەکەو حەشدی عەلی باپیر و حەشدی سەلاحی بەهادین و حەشدی گوڵەخانە دەیکەن، چ قازانجێکی بۆ پرسی کورد هەیە!؟
ئایا ئەوەی ئۆجەلان دەیڵێ و دەیکا کە ئامانجی لە چەکدانان بە پەکەکە بۆ ئەوەیە ئیسرائیل نەبێتە هۆی لاوازکردن و دابەشکردنی تورکیا؛ جاشایەتییەتی بۆ تورک، یان نیشتیمانپەروەرییەتی بۆ کورد!؟
ئایا لەم قۆناغە کە داگیرکەران بە دەست ئیسرائیلەوە گیریان خواردەوە، ئۆجەلان هەمان ڕۆڵی حەسەن خەیری و شێخ مەحمودی جەنگی یەکەمی جیهانیی، بۆ تورک ناگێڕێ!؟
بەڕاستی ئیسرائیل خاس داگیرکەران ئەکێڵێ! ڕونە، ئیسرائیل شەڕ بۆ کورد ناکات و، بەرژەوەندی خۆی هەیە. بەڵام دوژمنی دوژمنەکەمان دەکرێ بۆ ئێمە قازانج بگەیەنێ!
ئەگەر ئیسرائیل ئاوا لە ئاسمانەوە بەسەر عەرەب و فارسدا ئەو نیعمەت و بەرەکەتە دانەبارێنێ؛ بڕواتان هەبێ عەرەب و فارس زۆر زیاتر کورد دەخۆن و، بە ئاشکرا بە بەرچاوی جیهانەوە ئەتکی کەرامەتی کوردیش زۆرتر دەکەن!
ئیسرائیل لە مێژوی هاوچەرخ دا زۆر سودیشی بۆ کورد هەبوە. لە ١٩٦٤ ەوە دەیانجار خەستەخانەی لە باشوری کوردستان کردۆتەوەو، دەرمانی بۆ کورد ناردوەو، هاوکاری مادیی، سەربازیی و، تەنانەت پاڵپشتی سیاسیی بزافی باشوری کوردستانیشی زۆر کردوە. خۆزگه مەجالێک دەبو هاوکارییە نهێنییەکانی ئیسرائیل لە ١٩٦٤ تا ١٩٩٤ بۆ باشوری کوردستان، بۆ خوێنەران، سەر هەڵ بماڵم.
بۆیە، دژایەتیکردنی ئیسرائیل بە قازانجی داگیرکەرانی کوردستانەو، نابێت ئێمە بکەوینە سەنگەری پاراستن و پارێزگاریی لە داگیرکەرانی کوردستان.
سەرکردەکانی یەکێتیی-پارتیی ئەڵێن: با ئەم پرۆسەی چەکدانانەی پەکەکە زۆر بە میدیایی بکەین بۆ ئەوەی جیهان بزانێ کە؛ کورد ئاشیتیخوازە!!
ئەمە پێی ئەوترێت: گێلە گێل و بیانوهێنانەوە بۆ جاشبەتاڵیی پەکەکە. جیهان عیلاقەی چییە!؟
بۆ مەگەر سەدەیەکە دنیا نازانێ کە بەردەوام کوردی مەدەنی لەلایەن ئیمپریالیزمی تورک، ئیمپریالیزمی فارس و، ئیمپریالیزمی عەرەب، جینۆساید دەکرێ!؟
وا ئەزانن خەڵکی کوردستان هێندە نەفام و گێلن و ئێوە دەیاخەڵەتێنن؟
ئەی بۆ ناڵێن: ئێوەی یەکێتیی-پارتیی لە ژێر فەرمانی میت و ئیتلاعات دا پیاهەڵدان بەم جاشبەتاڵییەی پەکەکە دەکەن. بەسە، بەڕاستی ئێوەی یەکێتیی و پارتیی لەگەڵ پەکەکە ئابڕو و حەیای وشەی [شۆڕشگێڕبون!]ی کوردتان برد!
ئینجا گلەیی بۆ لە فاشیستێکی وەک ئەردۆگان بکەین؛ خۆ ئەردۆگان هیچ بەڵێنێکی نەداوەو هیچ ڕێکەوتنێکی لەگەڵ ئۆجەلان نەکردوە، ئەوە ئۆجەلانە جاشبەتاڵ به پەکەکە دەکات!
ئەوەنە گێلن، دەتانەوێ بەم شانۆگەریانە، ئیسلامێکی سیاسیی وەک ئەردۆگانتان بۆ فریو بدرێ و دواتر بڵێن: ئەردۆگان خاوەن بەڵێن نەبو!؟
دایک زۆڵەزنای وەک چەپ و ئیسلامی سیاسیی تورک و فارس و عەرەبی بۆ لەخشتەبردنی کورد بەخۆوە نەبینیوە!
ئەوەتانێ عێراق (ئێران)، بە ڕەزامەندی تورکیا، کێڵگە نەوتییەکانی هەرێمییش دەکاتە ئامانج. واتە: بەغدا تەکتیک لە دوای تەکتیک لە هەمان [پرۆسە]ی ستراتیژی ڕوخاندنی قەوارەی هەرێم دەیەوێ ڕێگا لەوەش بگرێت کە پارتیی و یەکێتیی بیر لەوەش بکەنەوە کە خۆیان بتوانن [نیوە موچە] بە خەڵکی کوردستان بدەن.
واتە: هەنگاو بە هەنگاو بەغدا دەیەوێ تەواوی بژاردەکان لەدەست سەرکردە [سەرمەست و کڕ کەوتوەکان]ی پارتیی و یەکێتیی نەهێڵێ! ئایا پارتیی و یەکێتیی بەم دۆخەشەوە ڕێگا ئەدەن کەسانێکی ئەکادیمیستی نیشتیمانی بەشداربن لەوەی خەڵکی کوردستان لەم برسێتییە ڕزگار بکەن!؟ یان چاوەڕوانی دوا تەکتیکەکانی ستراتیژەکەی بەغدا دەبن! لەکاتێکا لە سیاسەت دا: چاوەڕوانییش سنور و کاتی دیاریکراوی هەیە!
دەیڵێمەوە: گەر ڕێکەوتننامەش لە نێوان هەرێم و بەغدا بکرێ؛ هەر کاتییە، نەک ستراتیژیی. گرنگترینە چاکسازی گشتیی. با بۆ یەکجاریش بێ پارتیی و یەکێتیی بیسەلمێنن کە چاکسازی گشتگیر دەکەن. دوایین دەرفەتە!
16897 جار خوێندراوهتهوه
