دەربارەی كورد و جولەكە

وردو جولەكە هەردوك لە مێژودا ستەمی گەورەیان لێكراوە ، بوغزێنراون ، دەربەدەر كراون ، خاك و نیشتمانیان داگیرو وێران كراوە، لە ساڵی 1948 بە دواوە جولەكە دەوڵەتی ئیسرائیلی بۆ خۆی چێكردو لەو ساڵەشەوە تا ئێستا ڕۆژ لە دوای ڕۆژ خۆی زیاتر جێگیر دەكات و نەیارو دوژمنەكانیشی زیاتر تارو مار دەكات و بەردەوام بەربەست و لەمپەری خواست و خولیای خۆی تەخت دەكات و نەیارو دژەكانی ناچاری دانپیانان و ملدان دەكات ، وەك چۆن ئێستا بە نزیكەی هەموو عەرەبی ناچاری دانپیانان بە خۆی كردوەو ئەوەشی ئەو هەنگاوەی نەناوە تێك و پێكی شكاندوە، هەر عەرەبیشی ناچار كردوە كە ببێتە ناوبژ1یوانی خۆی و عەرەبە نەیارەكانی ، هەڵبەت ئێرانیشی بە دۆخێك گەیاندوە كە نەتوانێ‌ دژایەتی بكات ، توركیاش ئێستا لە هەر كات زیاتر لەو وڵاتە بچوكە دەترسێت ، جولەكە بە دەر لەوەی پێی گەیشتوە ، ئێستا بە ناوی ئاینی ئیبراهیمی و رێكەوتنی ئیبراهیمی و نوێژی پیرۆز و تەنانەت پڕۆژەی داود دەیەوێت وەك زلهێزو دەسەڵاتدارێكی گەورەی ناوچە دەربكەوێت ، بێگومان لە ئایندە بەوەش دەگات .

كورد وێڕای گەورەترین نەتەوەی بێدەوڵەت قوربانی ترین و بێكەس ترین نەتەوەی ناوچەكەیە ، سەدان ساڵە هەلا هەلاو جینۆساید دەكرێت ، تەنانەت كاتێك هاوكاری برا موسوڵمانەكانیشی دەكات ، ڕەشە كوژ دەكرێت و ناوی لەكەدار دەكرێت و بە لای عەرەبەوە هێشتا موالی و دواكەوتەی ئەوە، ئەبو موسلیمی خوراسانی ئەبو جەعفەری مەنسوری عەباسی دەكاتە خەلیفە كەچی ئەبو جەعفەر هەر بە كوشتن وازی لێناهێنێ‌ و ناوی دەگۆڕێ‌ بۆ ئەبو موجریم و باو باپیریشی بە خائین ناو دەبات، خۆ بۆ سەلاحەدینیش لەوە باشتر ناڵێن، ئێستا كە عەرەب پەلەیانە لەوەی ئامێز بكەنەبە دەوڵەتی ئیسرائیلدا ، كورد بۆ دژی ئەو ئاین و نەتەوەیە بێت، كە بڕواناكەم لە مێژوودا هیچ زیانێكی بە كورد گەیاندبێت ، ڕەنگە زۆر هەبن ئەمەیان پێناخۆش بێت ، بەڵام من باوەڕم بەوەیە كورد بە ئاشكرا ، وەك قەتەر ، ئیمارات، سودان ، میسرو ، ئەردەن و ئەوانی تر پەیوەندی ئاشكراو ڕوبەڕووی لە گەڵ جولەكە هەبێت، خێرە عەرەب ئازاری غەزە نەبینن و كورد بەو هەموو برینەی خۆیەوە زیاتر لە عەرەبی ببینێت.

ئەمڕۆ ئیسرائیل دەوڵەتێكەو لە ناوچەكەدایە هەموو وڵاتانی دەوروبەر جگە لە ئێران پەیوەندی ئاشكراو ژێر بە ژێریان لە گەڵیدا هەیە، زۆر جار باسی پەیوەندی ئێرانیش دەكرێت، بەڵام بە شێوازی دیكە، مێژوی خوێناوی كورد لە سەر دەستی تورك و فارس و عەرەب بەو جۆرە هاتوە، ئەو وڵاتە بەناو موسوڵمانانەی كە كوردستانیان بە سەردا دابەشكراوە ، وڵاتی ناسیونالیستی بووبن ، یان ئاینی و مەزهەبی ، بواری ئەوەیان نەداوە كورد بە زمانی خۆی بخوێنێ‌ و بنوسێت ، تەنها لە بەشێكی كوردستانی ژێر دەستی عێراق ئەو مافە هەبووە، ئەوەش لە بەشێكی زۆری ڕێپێدراو نەبووە ، ئەوە لە كاتێكا ڕۆژانە كوردەكانی ئیسرائیل گرتەی زندوی خۆیان بڵاو دەكەنەوە كە بە شانازیەوە گۆرانی كوردی دەڵێن و شایی و دیلانێی كوردی دەكەن ، قسەكە لە سەر ئەوەیە باشە لەمپەر چیە لەبەردەم پەیوەندی كوردو ئیسرائیل، بۆ ئاسای بێت عەرەبی ئەردەن و سوریاو میسرو شوێنگەلی دیكە پەیوەندی پتەویان لە گەڵ ئیسرائیل هەبێت و بەبەر چاویشیانەوە غەزە وێرانبكرێت و نقەیان لێوە نەیەت ، بۆ ئاسای نیە كورد ئەو پەیوەندیەی هەبێت ، هەڵبەت ئەمە ناكاتە ئەوەی كارو كردەی دڕندانەی سوپای ئیسرائیل بەرانبەر ژن و مناڵ و پیرو خەڵكی سڤیلی غەزەو فەلەستین لۆمە نەكرێت و لە قاو نەدرێت.

كورد وەك گەلێكی ستەملێكراوی بێماف ، بەردەوام لەبەردەم هەڕەشەی سڕینەوەدایە لەسەر دەستی تورك و فارس و عەرەب كە هەرسێ‌ گەل و دەسەڵاتەكانیان خۆیان بە موسوڵمان دەزانن، مافی ژیان و ئازادی و بونی لە سەر خاكی خۆی پێڕەوا نابینن، بۆ ئەوەی سۆزی  وڵاتان و گەلانی دنیا بە لای خۆیدا ڕابكێشێت مافی ڕەوای خۆیەتی لە گەڵ هەر كێ‌ بیەوێت پەیوەندی هەبێت بەو مەرجەی دانی پێدا بنێت و لە بارو دۆخی مەترسیداردا بیپارێزێت و هاوكاری بێت، ئەگەر دەوڵەتی جولەكەش نەبێت گەلی جولەكە جۆرێك لە هاوسۆزیان لە گەڵ گەلی كورد هەیە ، بۆیە دەبێت بایەخ بە پەیوەندی نێوان ئەم دوو گەلە بدرێت و پەرە بە دۆستایەتیان بدرێت، ئەوەشمان بیر نەچێت هیچ لایەنێكی فەلەستینی بە ئاشكرا تا ئێستا داكۆكی لە مافی كورد نەكردوە ، لە كاتێكا كەم شاعیر و نوسەرو مەلاو ئازادیخوازی كورد هەیە بە شیعرو نوسین و وتارو پەیام داكۆكی لە فەلەستین نەكردبێت، بۆخۆم لەو بارەیەوە شیعرو نووسینم هەیەو گەلی فەلەستین وەك گەلێكی شۆرشگێڕ دەبینم ، كەچی هەرە زۆری فەلەستینی بە حزب و ڕێكخراویانەوە لە پرسی داكۆكی كورد لە مافی خۆی هەق ئەدەن بەنەتەوەی سەردەست و دەسەڵاتە داپڵۆسێنەرەكان.